بأحكي تجربتي في منتجعات قوت ، بالبداية كنت متخوفة من التعليقات ولكن بصراحة طلع العكس ، أول ماوصلت المنتجع رحت الاستقبال أكمل الإجراءات الساعة ٣ العصر ، الموظفين محترمين جداً وخلوقين اثنين سعوديين وواحد سوداني ، دخلت المنتجع الجمييييل حسيت اني برا السعودية من جمال المكان والنظاااااافة والروائح الجميلة بيرفكت ، حتى صديقتي الأمريكية أعجبها المنتجع ، D3 ، الشامبو والصابون من لوكسيتان ، فخااااامة ونظافة ، أول ماوصلت كلموني قالوا بنجيب لك القهوة العربية ضيافة مننا ، المسبح الموية دافية والجاكوزي حار يجنن ، فيه غلايه وموية وشاي ونسكافية وسكر ضيافة ، يوجد مطعم في المنتجع اسعاره ممتازة ، والله كل مادقيت على خدمة الغرف استجابتهم سريعة ، غرفة النوم فخمة وبيكون منتجعي المفضل ، الدخول ٣ العصر والخروج اليوم الثاني الساعة ١٢ الظهر ، طبعاً عندهم افطار مجاني ل٤ اشخاص فطور رااااهي يجي على الساعة ٨ تكلمونهم ، من ناحية التأمين دخلت الاثنين وطلعنا الثلاثاء وأرسلت لهم رقم حسابي والخميس حولوا لي المبلغ وخصموا منه حق العشاء اللي طلبته أنصحكم فيه. هناك ملاحظة بسيطة بلاط المسبح يطلع ، لكن الموية صاااافية جداً ونظيييييفة ، شكراً لكل القائمين في المنتجع من صاحبها والموظفين والعاملين
الايجابيات: +المسبح واسع +المكيفات باردة + الموقع داخل الرياض
السلبيات: - أكبر سلبية تعامل موظفين الاستقبال سيئة وبون نفس بل بسوء خلق هذا على الجميع وبالاخص الموظف (صالح) يتعامل مع الزباين بفوقية وقل ذوق وقلة احترام. -الاثاث قديم جداً ومهتريء ويحتاج الى تجديد وجلسات الحديقة متسخةً من مخلفات العصافير والحمام. - تتصل عليهم من الشاليه ما يدرون عليك الا بشق الانفس.
انا م زرت الشاليه بس باين عليه فخم بس حتى لو فخم السعر مبالغ فيه ولا انصح احد بزيارته ودفع ه المبلغ عشان ليله وحده وبس سافر ب ه المبلغ ابرك لك لان هذا نصب واحتيال عيني عينك وشكراً
مكان راقي ونظيف والمطعم حقهم لذيييذ رحت لهم اكثر من مره لكن حالياً زعلت منهم رفعوا الاسعار بشكل مبالغ فيه وصارت الليلة ب٢٩٠٠! للشاليه الصغير يعني اغلا من كل الاماكن وكل الفنادق ارحمونا من الاستغلال
كانت تجربه رائعه، اقمنا فيه ٥ ايام الخدمه كانت ممتازه والمضيفين بشوشين والمكان نظيف جداً، مع توفر فطور مجاني مع الحجز، بالاضافه الى التجاوب السريع من خدمه الغرف انصح بزياره منتجعات قوت خصوصاً للعرسان
الشاليه ممتاز المشكلة في شخص سعودي لهجة من القصبم في الادارة تعامله سيء جدا مددت ليلة اضافية وجايدق الباب أدفع حق التمديد للأسف مااتبع الأسلوب المتعارف عليه من الاتصال بالهاتف او عند الخروج ندفع.
الشاليه جداً نظيف و كبير في حراسة و أمن خارجي شامل الإفطار مكون من أومليت و جرة فول و جبنة هنقاري و زيتون و عسل و مربى و خبز و توست و غيره الغداء و العشاء على حسابك مواقف السيارة خارجي الموظفين متعاونيين يوجد واي فاي
الشاليه مكون من مجلس خارجي و دورة مياه و طاولة و مرجيحة و مسبح كبير و صغير للاطفال مع مروش و طبعا نظيف و كراسي مقابل المسبح و مجلس داخلي مع طاولة طعام ودورة مياه مع مغاسل و غرفة نوم مع دورة مياه و جاكوزي و مطبخ أمريكي مكون من ثلاجة صغيرة و غلاية و ميكرويف و بوتغاز كهربائي لكن غير شغال على كلام المنتجع منع الدفاع المدني من تشغيله لكن أطلبوا منهم عين بوتغاز و يوفروه لكم و ينقصهم أدوات الطعام طبعا فيه مناديل يد و مناديل دورة المياه و صابون يد و شامبو و كريم و جل استحمام و مناشف و غيره
اخذت شاليه صغير الدخول يوم السبت بسعر ٢١٤٥ ريال الإيجابيات: - فخامه وتصميم واثاث جميل جداً، كأنك ساكن في فيلا تابعه لفندق ٥ نجوم - المسبح كبير وكافي جداً لافراد عائلة واحدة ورفيع يعني ماتخاف منه على الاطفال - يوجد ٣ حمامات في الشاليه - المنتجع قريب من المطاعم والخدمات - يوجد مجلس في بداية الشاليه مفصول عن الصاله وغرفة النوم السلبيات: - بعض الاثاث مستهلك ويحتاج تبديل - يوجد مسبح صغير قطره تقريباً ٢م ماتدري تصنفه جاكوزي أو للجلوس لان فيه جلسه واذا كان جاكوزي فماكان شغال (تمنيت عدم وجوده بصراحه) لانه اشغلنا - الاستقبال والمطبخ يقفل الساعه ١٢ الليل - فيه ريحه بحمام المجلس معلومات عامه: - الشاليه يتكون من مجلس و صاله وغرفة صغيره فيها كنب وغرفة نوم واحدة فقط ، يعني مخصص لنوم شخصين واحتمال يكون في اسره اضافيه عند الطلب - الشاليه لايوجد فيه مطبخ ولا حتى كونتر ولا صحون او ملاعق وسكاكين ولكن حسب كلام الاستقبال انه يوجد مطبخ مركزي تقدر تطلب منه أي شيء تحتاجه (انا ماجربت اطلب) ولكن اتصلت الساعه ١٢ لطلب ثلج ولم يتم الرد هذا علمي وسلامتكم
السعر غالي ويجبرك الكوشة من عندهم ويجبرك البوفيه من عندكم اقوى من كذا استغلال مافيه المصيبة حتى البوفبه حقهم غالي والكوشة غالية ليتها نفس برى عشان الواحد يقول انه خايف على الشالبه حقه
تجربة رائعة. المسبح نظيف. الغرفة نظيفة. لايوجد حشرات. الحمامات نظيفة جداً. عيوبه: خدمة الغرفة لم تكن بالشكل المطلوب ، كذلك لايوجد قنوات تلفزيونية مشهورة الموجود القناة السعودية وقناة المجد وكم قناة مثلهما. التلفاز لايشغل تطبيقات اليوتوب والنتفلكس.
حقيقة منتجع أكثر من رائع تجاوب الاستقبال وسرعة إنهاء إجراءت الدخول، الهدوء والراحة، وجود الأمن علي مدار اليوم كامل، الإفطار لذيذ جداً ومتنوع، القهوة العربية قدموها لنا مجانا مع التمر تجربة جميلة وسأكررها بإذن الله
الحجز سهل لكن الشالية ما كان مهيئ. دخلنا الشالية مايشتغل مكيف المجلس تواصلت معهم كل شوي راسلين فني. كل شوي داخل عامل. ثم جو ٣ يعبون موية المكيف من مكيف المسبح! فعلياً تنكدنا محبوسين، انتهينا من سالفه المكيف الي صار انها بالسستم مقفلينه ؟!
نجي لسالفه المسبح وصخ يقرف الارض لزجة، ما يشهي لسباحة. وحشرات وطبقة فوقه بلغناهم ان المسبح ارضه لزجه، ارسلوا فني يشغل الفلتر! في احد يطفي فلتر؟! طبعاً ما سوى الفلتر شي. وشوفوا بالصور طبقه على المويه طبعاً التواصل معهم معانات. حاطين تلفون في كل مكان لكن ما تسمع منها يالله. واذا جيت تكلم محد يرد! جلست بس اكلم ثلث ساعه مافي اي رد!
لكن يبدو ان اقامتنا نجي نعلمهم ان فريق العمل ما يشتغل زين. طبعا انا تواصلت معهم مافي اي تفاعل او استجابه او اعتذار. اقلها اعترفوا بالغلط
مكاااان راقي جداً جداً جداً للمره المليون نحجز عندهم يجنن يعني فعلياً اللي وده يغير جوو يحجز عندهم تعاملهم جميييل وعندهم خدمة طلب الاكل من مطعمهم الخاص واكلهم لذيذ ويوصلك حار أهنيهم على هالمنتجعات الراقيه ️
سمعت عنها كثيرا وتيسر لي زيارتها ولفت نظري فيها نسبة الأمن في المنتجع ونظافة المكان وجودة التكييف والخدمة الفندقية ومن أجمل الأشياء قائمة الطعام التي تشمل مجموعة من أشهى وألذ الأطعمة كالسمك المشوي والمشاوي عموما والبرياني والاسباقيتي وعندهم تبولة غاية في اللذة مع طقم سفرة جميل ويصلك الطعام وتصفه لك العمالة على السفرة. لقد جربت منتجعات خمس نجوم في الهاف مون لكن منتجعات قوت في الرياض تفوقت عليها. الشاليهات في مجمع مغلق ويوجد حراسة والأبواب فيها متانة والمسبح والشلال والجاكوزي داخل كل شاليه حكاية أخرى. الله يعطيهم العافية.
أفضل مكان بالرياض ممكن تقضي فيه يوم مع العائلة إجراءات الدخول والخروج سريعة الإطلالة الداخلية بالشاليه مناسب جدا للعرسان وللمناسبات الخاصة سعي الموظفين الدائم لرضا النزلاء المكان بشكل عام ممتاز
مكان جميل وهادئ ونظيف والخدمة راااااائعة، مهتمين بأدق التفاصيل، لباقة الأسلوب ورقي التعامل من جميع الموظفين، المسبح نظيف، الإفطار لذيذ، وقدموه لنا مع قهوة عربية مجانا، شكرا لكم قوت من أعماق القلب
انخفظ مستوى الشالية كثيرا -لاحظت وجود الكثير من الحشرات -الهاوس كيبينق مزعجين جدا تقوله ارجع بعد ساعه خذ الفطور كل ربع ساعه يدق عليك واحد يبي الصحون ؟؛ -المطعم وجوده مثل عدمه يسكر بدري ومعظم الاصناف مو متوفره.
سيئ لا افكرا ابداً بتكرار التجربة. لايوجد قنوات في التلفزيون ولا يمكن تشغيل اصوات على الشاشة ولا يوجد نظام مسرح منزلي داخل الشالية ويوجد فقرة في لوائح نظام الاستئجار مستفزة جداً وهي حتى لو حجزت كسيدة مع عائلتي الشالية ودفعت الرسوم كاملة يجب عند دفع التامين وتوقيع العقد أن احضر حسب قولهم (ولي الأمر زوج أو والد، لدفع التامين الذي سوف ادفعه أنا لحجزي أنا وتقديم أصل بطاقة العائله ومطابقتها والتوقيع!) من اسواء الشاليهات.
الصراحه السعر مبالغ فيه جداً على الخدمات المقدمة وللاسف خدمة العاملين غير سريعه ويوجد حشرات داخل المبنى والباعوض والمسبح لايوجد فيه سخانات حيث كان بارد جداً ولا استفدنا منه كذلك اكل المطعم مو لذيذ وهذا رائيي الشخصي اتمنى من الاداره القائمة على هذا المنتجع تفادي هذي الملاحظات وتخفيض المبلغ وصدوقني رايح يطلع افضل منتجع فالرياض